Прогласување на Малешево за Заштитен Предел
![](http://green-press.com/wp-content/uploads/2021/08/berovsko-ezero-poseta.jpg)
Министерството за животна средина и просторно планирање (МЖСПП) во соработка со Македонсктоо еколошко друштво (МЕД), Јавното претпријатие „Национални Шуми“ и општините Берово и Пехчево започнуваат со кампања за прогласување на Малешево за заштитен предел.
Целта на кампањата е да се информира и запознае јавноста за тоа што претставува „заштитено подрачје“, како може да се зачуваат природните вредности и воедно да се обезбедат економски придобивки од заштитените подрачја. Јавната расправа што ќе се организира ќе овозможи и активно вклучување на јавноста во процесот на прогласување на Малешево за заштитен предел. Кампањата ќе трае во следните 10 дена, а ќе опфати промоција на видеа, илустрации и други промотивни содржини.
Што го прави Малешево посебно?
![](http://green-press.com/wp-content/uploads/2021/08/aurora-696x392-1.jpg)
Низ многу години, бројни генерации препознавале голема вредност во природата на Малешево. Но, првите посериозни истражувања потекнуваат од 1978 година. По бројни студии и многу работа токму оваа година Малешево е предложено да стане заштитено подрачје во категорија V- заштитен предел, заради разновидноста и богатството на биодиверзитетот, геодиверзитетот, хидролошките карактеристики, пејзажните, пределните и други вредности и природни убавини. Малешево навистина го заслужи тоа!
![](http://green-press.com/wp-content/uploads/2021/08/walking-v1.jpg)
Регионот Малешево, што ги опфаќа општините Берово и Пехчево, претставува целина која се истакнува со своето природно и културно богатство, каде што управувањето со шумите е долгогодишна традиција.
Малешевијата е област во која природата истурила едно чудо убавини, природни богатства од кои застанува здивот. Борови, дабови и букови шуми, чисти реки, разновидност од цвеќиња и лековити чаеви, мноубројни животински видови, традиции, храна. Малешево навистина ги исполни сите услови за да стане заштитено подрачје! Кампањата е поддржана од Програмата за зачувување на природата во Северна Македонија (ПЗП), проект на Швајцарската агенција за развој и соработка (SDC), а координиран од „Фармахем“ од Скопје. Кампањата е поддржана и од општините Берово и Пехчево. Слоган на Кампањата е: Да го зачуваме Малешево за идните генерации!